Ішкі тәртіп ережелері

«Республикалық Медицина Академиясы» жауапкершілігі шектеулі серіктестігі (бұдан әрі — «РМА» ЖШС) студенттерінің ішкі тәртіп ережелері білім беру процесіне саналы көзқарасты тәрбиелеуге, оқу тәртібін нығайтуға, оқу уақытын тиімді пайдалануға, үлгерімді арттыруға ықпал етуі қажет.

Оқу тәртібі студенттердің өз оқу міндеттерін саналы және адал орындауына негізделеді.

Оқу тәртібі сендіру әдістерімен қамтамасыз етіледі. Тәртіп бұзушыларға тәртіптік және қоғамдық ықпал ету шаралары қолданылады.

Студент болып «РМА» ЖШС директорының бұйрығымен оқуға қабылданған тұлға саналады.

Студент «РМА» ЖШС білім беру үрдісінің негізгі субъектісі болып табылады.

Студенттердің құқықтары мен міндеттері «РМА» ЖШС Жарғысымен және осы ішкі тәртіп Ережелерімен (бұдан әрі — Ереже) анықталады.

«РМА» ЖШС студенттеріне студенттік билет және үлгерім кітапшасы беріледі, олар «РМА» ЖШС бітіргеннен кейін оқу бөліміне тапсырылады.

Білім беру бағдарламаларын игерудегі, эксперименттік және «РМА» ЖШС үшін басқа да жұмыстардағы жетістіктері үшін моральдық және материалдық көтермелеудің әртүрлі нысандары белгіленеді.

Студенттер құқылы:

• мемлекеттік жалпыға міндетті білім беру стандарттарына сәйкес білім алуға;
• өзін-өзі басқару органдарына сайлауға және сайлануға, «РМА» ЖШС қызметінің маңызды мәселелерін шешуге қатысуға;
• бастауыш кәсіподақ ұйымының мүшелігіне кіруге және сайланбалы кәсіподақ органдарына сайлануға, кәсіподақ конференцияларына, съездерге делегат болуға;
• «РМА» ЖШС оқу кабинеттерін, зертханаларын, аудиторияларын, кітапханасын, басқа да бөлімшелерін және олардың жабдықтарын оқу мақсатында тегін пайдалануға;
• оқу жоспары шегінде оқытудың мамандануын таңдауға;
• қосымша сабақтар мен факультативтерге қатысуға;
• «РМА» ЖШС-нің ғылыми-зерттеу, эксперименттік, шығармашылық қызметіне қатысуға;
• «РМА» ЖШС әкімшілігінің бұйрықтары мен өкімдеріне заңнамада белгіленген тәртіппен шағымдануға;
• заңда белгіленген тәртіппен мерзімді әскери қызметке шақыруды кейінге қалдыруға;
• білім беру ұйымдарында білім алушыларға академиялық демалыс беру ережелеріне сәйкес академиялық демалыс алуға;
• білім алушыларды білім беру ұйымдарының үлгілері бойынша ауыстыру және қайта қабылдау ережесі негізінде Қазақстан Республикасы Білім және ғылым министрлігі белгілеген тәртіппен бір оқу орнынан екіншісіне, бір мамандықтан екіншісіне немесе бір оқу нысанынан екіншісіне ауысуға және қайта қабылдануға;
• сабақтан тыс уақытта спорттық секцияларға қатысуға;
• «РМА» ЖШС шығармашылық ұжымдарының жұмысына қатысуға;
• клубтардың жұмысына қатысуға;
• «РМА» ЖШС-нің барлық іс-шараларына қатысуға;
• студенттер заңнамада белгіленген барлық басқа да құқықтарға ие.

«РМА» ЖШС студенттері міндетті:

• таңдаған мамандығы бойынша кәсіби білімді, практикалық дағдылар мен іскерлікті жүйелі және терең меңгеруге;
• оқу жоспары мен оқу бағдарламаларында қарастырылған тапсырмалардың барлық түрлерін белгіленген мерзімде орындауға;
• тәртіпті болуға, «РМА» ЖШС Жарғысын, осы Ережені сақтауға;
• жалпы мәдениетін арттыруға, адамгершілік және дене тұрғысынан жетілуге үнемі ұмтылуға;
• «РМА» ЖШС қызметкерлерінің қадір-қасиетін құрметтеуге;
• еңбекқорлықты тәрбиелеуге, «РМА» ЖШС-де және практика базаларында өзіне-өзі қызмет көрсетуге белсенді қатысуға, белгіленген жұмыс режимін сақтауға;
• оқу сабақтарына қатысуға, сабақ басталардан 10 минут бұрын келуге;
• «РМА» ЖШС бойынша кезекшілікке қатысуға және тәртіпті қолдауға;
• қоғамдық пайдалы еңбекке қатысуға;
• «РМА» ЖШС меншігін сақтауға және нығайтуға;
• қоғамға жат көріністерге төзбеушілік танытуға, ұжымның қоғамдық өміріне қатысуға, болашақ мамандығының абыройы мен беделін қолдауға;
• адамдарға қайырымдылық, мейірімділік және жанашырлық танытуға, дөрекілік, анайылық, қатыгездік көріністерін болдырмауға;
• оқытушы аудиторияға кірген кезде орнынан тұрып амандасуға;
• оқу сабақтары кезінде оқытушылардың түсіндірмелері мен жолдастарының жауаптарын мұқият тыңдауға, сөйлеспеуге және бөтен істермен айналыспауға, оқытушының барлық нұсқауларын орындауға;
• сұрақ қою және жауап беру кезінде оқытушының рұқсатымен тұруға және отыруға;
• сабақ уақытында аудиторияға тек оқытушының рұқсатымен кіруге және шығуға;
• зертханаларда, клиникаларда, кабинеттерде сабақ кезінде және өндірістік практика кезінде сабақ жетекшісі көрсеткен құралдарды, аспаптарды және басқа да құралдарды ғана пайдалануға, оларға ұқыпты қарауға және қауіпсіздік техникасы ережелерін сақтауға;
• сабақтан қалу себептеріне қарамастан білімдегі олқылықтарды жоюға;
• сабаққа ауруы немесе басқа да дәлелді себептермен келмеген жағдайда үш күн ішінде бұл туралы директордың оқу ісі жөніндегі орынбасарына, бөлім меңгерушісіне немесе топ жетекшісіне хабарлауға;
• ауырған жағдайда емдеу-алдын алу ұйымынан белгіленген нысандағы анықтама ұсынуға;
• дәлелсіз себептермен сабақтан қалған жағдайда ақылы білім беру қызметтерін көрсету туралы Ережеге сәйкес қосымша сабақтарға, кеңестерге қатысу арқылы білімдегі олқылықтарды жоюға.

Оқу процесі кезінде іскерлік атмосфераны құру және санитарлық-гигиеналық нормаларды сақтау, эстетикалық талғамды, киім мәдениетін тәрбиелеу, медициналық мамандыққа деген сүйіспеншілік пен құрметті қалыптастыру, студенттер арасындағы әлеуметтік, мүліктік және діни айырмашылық белгілерін жою, ҚР «Білім туралы» Заңының 47-бабының 15-1-тармағына сәйкес құрдастарының алдында психологиялық ыңғайсыздықтың алдын алу үшін студенттер колледжде белгіленген сыртқы келбетке қойылатын бірыңғай талаптарды сақтайды — медициналық ұйым қызметкеріне сәйкес киім нысаны (ақ халат, қалпақ, ауыстырмалы аяқ киім):

• медициналық халат (таза, жақсы үтіктелген, барлық түймесі мұқият салынған, ұзындығы тізеден жоғары емес, жеңінің ұзындығы шынтақтан білекке дейін) киімді толық жабуы тиіс;
• медициналық қалпақ;
• маусымға сай ауыстырмалы аяқ киім;
• сабақтарда шаш ұқыпты жиналуы керек (ұзын шашты жайып жүруге рұқсат етілмейді);
• тырнақ қысқа алынған (тырнаққа лак жағылмайды);
• дене шынықтыру сабақтарына арналған спорттық киім (футболка, спорттық шорт, спорттық шалбар, спорттық костюм, кеды немесе кроссовка) ауа райына және сабақ өтетін орынға сәйкес болуы тиіс.

Әр топта директордың бұйрығымен оқу жылына ең үлгерімді және тәртіпті студенттер қатарынан топ старостасы тағайындалады.

Топ старостасы топ жетекшісінің басшылығымен жұмыс істейді.

Топ старостасының міндетіне топтағы тәртіпті сақтау, оқулықтар мен оқу құралдарын уақытында алу және студенттер арасында тарату, топ жетекшісіне қоғамдық іс-шараларды ұйымдастыруға және өткізуге көмектесу кіреді.

Топ старостасы әр күнге кезек тәртібімен топ бойынша кезекші тағайындайды. Кезекші тәртіптің, мүліктің сақталуын және санитарлық-гигиеналық режимнің сақталуын қадағалайды, сабақтан кейін кабинеттер мен зертханаларда ылғалды тазалау жүргізеді, сабақтың басына қажетті қосалқы материалдар мен көрнекі құралдарды дайындайды және оларды сабақтан кейін кабинет меңгерушісіне немесе лаборантқа уақытында тапсырады.

«РМА» ЖШС студенттеріне тыйым салынады:

• студенттік билетті басқа тұлғаға беруге;
• «РМА» ЖШС ғимаратында және оқу корпусына іргелес аумақта темекі шегуге;
• спирттік ішімдіктер ішуге, есірткі және улы заттарды қабылдауға, сондай-ақ оларды таратуға;
• оқу сабақтары кезінде сағыз шайнауға;
• аудиториялардан оқу журналдарын өз бетінше алуға және шығаруға;
• сабақ кезінде «РМА» ЖШС қабаттарында сыртқы киіммен және бас киіммен жүруге, кабинеттер мен зертханаларға кіруге;
• балағат сөздер айтуға.

Жоғары оқу үлгерімі және қоғамдық жұмысқа белсенді қатысқаны үшін студенттерге моральдық және материалдық көтермелеудің әртүрлі түрлері белгіленеді:

• алғыс жариялау;
• Құрмет грамотасымен марапаттау;
• бағалы сыйлықпен марапаттау.

Оқу және еңбек тәртібін, «РМА» ЖШС Жарғысын, осы Ережені бұзғаны үшін студенттерге мынадай тәртіптік жазалар қолданылуы мүмкін:

• ескерту (оқытушы, топ жетекшісі, әкімшілік ауызша жасайды);
• ескерту (жазбаша түрде жарияланады);
• сөгіс;
• колледж Жарғысын қайталап өрескел бұзған жағдайда оқу орнынан шығару туралы ескертумен қатаң сөгіс.